ខ្សែប្រយុទ្ធស្លាបហុល្លង់ Cody Gakpo និយាយថា នឹងពិចារណា បើក្លឹប Manchester United ដាក់សំណើចង់បានខ្លួន។
កាលពីថ្មីៗនេះ Gakpo បានបង្ហើបថា រូបគេមិនទាន់ទទួលបានសំណើរណាមួយពីក្លឹបបិសាចក្រហម Manchester United ឡើយ។ បើសិនក្លឹបស្នើមក កីឡាកររូបនេះនឹងពិចារណាយ៉ាងដិតដល់។ Gakpo បានបញ្ជាក់ទៀតថា ក្នុងអំឡុងពេលរដូវកាលផ្ទេរកីឡាកររដូលក្ដៅកន្លងទៅនេះ ខ្លួនបាននឹកគិតដល់បិសាចក្រហម តែក្លឹបមិនបានដាក់សំណើណាមួយមកឡើយ។
សារព័ត៌មានធំៗជាច្រើនបានចុះផ្សាយអំពីពាក្យចចាមអារ៉ាមដែលថា Manchester United ចង់បាន Gakpo ហើយនឹងព្យាយាមទាក់ទងផ្ទេរកីឡាករនេះនៅទីផ្សារដោះដូរកីឡាករនាខែមករាខាងមុខនេះ ពីក្លឹប PSV។
Gakpo លេងឲ្យ PSV តាំងពីឆ្នាំ ២០១៨ មកគិតមកទល់ពេលនេះ កីឡាករនេះលេងឲ្យក្លឹបបាន ១០៦ ប្រកួត និងស៊ុតចូល ៣៦ គ្រាប់។
កីឡាករវ័យ ២៣ឆ្នាំ Gakpo កំពុងជួយក្រុមជម្រើសជាតិហុល្លង់ក្នុង World Cup ហើយបានបង្ហាញទម្រង់លេងយ៉ាងល្អ។ កីឡាករនេះស៊ុតចូល ៣ គ្រាប់ ក្នុង ៤ ប្រកួត World Cup។ប៉ុន្ដែពេលនេះគេបានអស់ឪកាសឡើងទៅវគ្គបន្ដហើយ បន្ទាប់ពីចាញ់អាហ្សង់ទីន។
