យោងតាមគ្រូបង្វឹកថ្មី Luis de la Fuente បានឱ្យដឹងថា Sergio Ramos មានឱកាសក្នុងការវិលត្រឡប់មកកាន់ក្រុមជម្រើសជាតិអេស្ប៉ាញវិញ។
ខ្សែការពារជើងចាស់ Paris Saint-Germain គឺជាអ្នកបង្ហាញខ្លួនច្រើនជាងគេគ្រប់ពេលវេលារបស់គោជល់អេស្ប៉ាញ ដោយបង្ហាញខ្លួនបាន ១៨០ដង ខណៈដែលគាត់ជាផ្នែកមួយនៃក្រុមដែលឈ្នះពានរង្វាន់បាល់ទាត់ពិភពលោកឆ្នាំ២០១០ ក៏ដូចជាការឈ្នះជើងឯកអឺរ៉ុបក្នុងឆ្នាំ២០០៨ និង២០១២។
ទោះជាយ៉ាងណាក៏ដោយកីឡាករវ័យ ៣៦ឆ្នាំដែលបានលេង ២៧ដងសម្រាប់ PSG នៅរដូវកាលនេះមិនបានបង្ហាញខ្លួនសម្រាប់ប្រទេសរបស់គាត់ចាប់តាំងពីការទទួលជ័យជម្នះ ៣-១ លើកូសូវ៉ូក្នុងខែមីនាឆ្នាំ២០២១ ហើយបានខកខានការប្រកួត Euro ២០២០ និង World Cup ២០២២ ជាបន្តបន្ទាប់។
ទោះជាយ៉ាងណាក៏ដោយ De La Fuente បានបើកទ្វារចំហសម្រាប់ Ramos នៅមុនការប្រកួតដំបូងរបស់គាត់ដែលទទួលបន្ទុក អេស្ប៉ាញទល់នឹងន័រវេសក្នុងវគ្គជម្រុះ Euro ២០២៤ របស់ពួកគេក្នុងខែមីនា។
ថ្លែងអំឡុងពេលបង្ហាញខ្លួនក្នុងកម្មវិធី El Hormiguero របស់អេស្ប៉ាញ គាត់បាននិយាយថា៖
“Sergio Ramos ដូចជាកីឡាករជើងចាស់ដ៏ល្បីផ្សេងទៀត មានឱកាសគ្រប់បែបយ៉ាងដើម្បីមក។ ការជ្រើសរើសគឺជាដំណើរការដ៏វែងមួយ។ ដំបូងយើងចាប់ផ្តើមដោយការគ្រប់គ្រងកីឡាករអេស្ប៉ាញទាំងអស់ បន្ទាប់មកយើងកាត់បន្ថយវាមកត្រឹម ៧០ ឬ ៨០នាក់ បន្ទាប់មកទុក ៦ ឬ៧នាក់ក្នុងមួយមុខតំណែង ហើយបន្ទាប់មកយើងកាត់បន្ថយវាបន្ថែមទៀត។
ជាការពិតណាស់នៅក្នុងគំនិតដំបូង ទាំង Sergio Ramos និង Iago Aspas ឬកីឡាករបាល់ទាត់អេស្ប៉ាញផ្សេងទៀតដែលល្អទាំងអស់មានលទ្ធភាពក្នុងការត្រឡប់មកវិញ។ ទោះជាយ៉ាងណាក៏ដោយ នោះមិនមែនមានន័យថាពួកគេនឹងមកនោះទេ ពីព្រោះមានកីឡាករផ្សេងទៀតក៏ល្អផងដែរ ហើយអ្នកត្រូវឱ្យតម្លៃលើទិដ្ឋភាពជាច្រើន បន្ថែមពីលើបាល់ទាត់ នៅពេលធ្វើការកោះហៅ”៕
