ច្បាស់ហើយ! ប៊ូខាវ នឹងធ្វើដំណើរមកខ្មែរ ខណៈក្រសួងការពារជាតិកម្ពុជា សំណូមពរបងប្អូនរក្សាភាពថ្លៃថ្នូរ

កីឡាករប្រដាល់ថៃ ប៊ួខាវ រួមដំណើរជាមួយក្រុមកីឡា ឃីកបុកស៊ីង របស់ថៃនឹងធ្វើដំណើរមកកម្ពុជានៅថ្ងៃទី ១២ ខែឧសភា ឆ្នាំ២០២៣នេះ ដើម្បីចូលរួមព្រឹត្តិការណ៍កីឡាអាស៊ីអាគ្នេយ៍លើកទី៣២ នៅកម្ពុជា។

ដំបូងឡើយ ប៊ូខាវ បានប្រកាសថារូបគេ នឹងមិនមកចូលរួមព្រឹត្តិការណ៍ស៊ីហ្គេម ២០២៣នេះទេ ដោយសារបញ្ហាផ្ទាល់ខ្លួន។ ប៉ុន្តែពេលនេះ កីឡាករ ប៊ូខាវ បានសម្រេចថានឹងរួមដំណើរជាមួយក្រុមកីឡា ឃីកបុកស៊ីងរបស់ថៃ ដើម្បីចូលរួមព្រឹត្តិការណ៍ស៊ីហ្គេមនៅកម្ពុជា។ អត្តពលិកថៃ នឹងត្រូវប្រកួតវិញ្ញសា ឃីក បុកស៊ីង ចាប់ពីថ្ងៃទី១៣ ខែឧសភា ឆ្នាំ២០២៣នេះ តទៅ ។

ក្រសួងការពារជាតិកម្ពុជា បានបង្ហោះនៅលើទំព័រហ្វេសប៊ុកផ្លូវការថា ​”សំណូមពរដល់បងប្អូនយើង សូមរក្សាភាពថ្លៃថ្នូរ និងសុជីវធម៌របស់យើង កុំប្រមាថលើបុគ្គលណាម្នាក់ ក្នុងនាមយើងជាម្ចាស់ផ្ទះ”៕