ថ្នាក់ដឹកនាំក្លឹប PSG មិនចង់ឱ្យខ្សែប្រយុទ្ធ Lionel Messi យកពានរង្វាន់ FIFA World Cup 2022 មកលើកបង្ហាញអ្នកគាំទ្រនៅកីឡដ្ឋាន Parc des Princes នោះទេ។
ជាគម្រោង Messi អាចនឹងយកពាន World Cup មកលើកបង្ហាញអ្នកគាំទ្រនៅពេលគេត្រលប់មកលេងឱ្យក្រុម PSG វិញនាពេលខាងមុខនេះ ដើម្បីបង្ហាញជាស្នាដៃដែលគេទទួលបាន។ យ៉ាងណាមិញ គម្រោងនោះនៅមិនទាន់យល់ព្រមពីខាងថ្នាក់ដឹកនាំក្លឹប PSG នោះទេ។ ដោយពួកគេគិតថា Messi ជាអ្នកយកឈ្នះលើក្រុមបារាំងនៅវគ្គផ្ដាច់ព្រ័ត្រ បើយកពានមកលើកថែមទៀតនោះមើលទៅមិនសមរម្យនោះទេ បើទោះជាគេជាកីឡាកររបស់ក្លឹបនៅបារាំងក៏ដោយ។
រំលឹកថា Messi កំពុងសម្រាកនៅប្រទេសអាហ្សង់ទីន ក្រោយពីធ្វើពិធីដង្ហែរពានយ៉ាងគគ្រើកគគ្រែងមក ដែលមានពលរដ្ឋប្រមាណជាង៤លាននាក់ចូលរួម។ ប្រធានក្រុមអាហ្សង់ទីនរូបនេះជាអ្នកកាន់ពានហ្សីនដែលមានទម្ងន់ជាង៦គីឡូក្រាមតាំងពីលើកពាននៅកាតា រហូតមកដល់ការដង្ហែរនៅអាហ្សង់ទីន។ ក្រោយពីនេះ FIFA នឹងយកពានហ្សីនទុកវិញ ហើយផ្ដល់ឱ្យអាហ្សង់ទីនទុកពាន Copy ប៉ុណ្ណោះ៕
