ពោរពេញដោយកំហឹង លោក Antonio Conte បានឆ្លើយតបទៅអ្នកគាំទ្រ Spurs ដែលបានស្រែកចំអកកូនក្រុមរបស់គាត់នៅតង់ទីមួយ អំឡុងពេលពួកគេចាញ់ Liverpool ២-១ ក្នុងដីខ្លួន។
អ្នកចាត់ការសញ្ជាតិអ៊ីតាលីដែលកំពុងរំជួលចិត្តបានប្រាប់ថា គាត់អាចនឹងដើរចេញពីក្លឹបមាន់ខ្នាយមាសនៅពេលកុងត្រារបស់គាត់ផុតកំណត់នៅចុងរដូវកាលនេះ ប្រសិនបើអ្នកគាំទ្រមិនរក្សាជំហរនៅពីក្រោយកីឡាកររបស់គាត់។
គាត់បាននិយាយថា៖
“ខ្ញុំគិតថា ពួកយើងត្រូវតែបង្ហាញការគោរពដ៏ខ្ពង់ខ្ពស់នៅគ្រប់ពេលវេលាសម្រាប់អ្នកគាំទ្ររបស់យើងដែលបានទិញសំបុត្រចូលទស្សនា។”
“ប៉ុន្តែប្រសិនបើអ្នកសួរខ្ញុំថាតើខ្ញុំខកចិត្តទេនៅថ្ងៃនេះ? ខ្ញុំត្រូវតែឆ្លើយថាខ្ញុំពិតជាខកចិត្តណាស់ ព្រោះវាជាការសំខាន់ដែលត្រូវនិយាយការពិត។”
“រយៈពេលមួយឆ្នាំនេះ ពួកយើងបានធ្វើបានល្អប្រសើរជាងមុនជាច្រើន ប៉ុន្តែប្រសិនបើនរណាម្នាក់គិតថាយើងត្រៀមខ្លួនរួចរាល់ដើម្បីឈ្នះពានរង្វាន់ ខ្ញុំត្រូវតែប្រាប់អ្នកវិញថា វាពិតជាលំបាកណាស់។”
“ពួកយើងនៅឆ្ងាយពីក្រុមដែលធ្លាប់ឈ្នះពានខ្លាំងណាស់។”
“ដូច្នេះអ្នករាល់គ្នាត្រូវយល់ពីតម្រូវការនៃពេលវេលា និងការអត់ធ្មត់ បើមិនដូច្នោះទេ យើងអាចបាត់បង់ភាពរីករាយដែលជាកត្តាជម្រុញរបស់ខ្ញុំ។”
“ដូច្នោះយើងត្រូវផ្ដល់ពេលវេលាការជឿជាក់ លើកីឡាកររបស់យើង ត្រូវលើកទឹកចិត្តដើម្បីផ្ដល់នៅកំលាំងចិត្តបន្ដទៅមុនទៀត”៕
