ខ្សែប្រយុទ្ធវ័យក្មេង Alejandro Garnacho ត្រូវបានកោះហៅចូលជម្រើសជាតិឈុតធំរបស់អាហ្សង់ទីនត្រៀមលេងមិត្តភាពនាពេលខាងមុខនេះហើយ ក្រោយពីរូបគេធ្វើបានល្អនៅប៉ុន្មានប្រកួតចុងក្រោយជាមួយក្លឹប Manchester United។
កីឡាករវ័យ១៨ឆ្នាំខាងលើត្រូវបានលោក Erik ten Hag ផ្ដល់ទំនុកចិត្តខ្ពស់មែនទែននៅប៉ុន្មានប្រកួតចុងក្រោយមកនេះ។ រូបគេក៏ជាអ្នករកបានគ្រាប់បាល់ជ័យជម្នះនៅចុងម៉ោង១គ្រាប់ឱ្យ Man Utd ទល់ក្រុម West Ham កាលពីពេលកន្លងទៅនេះផងដែរ។ ដោយសារតែបង្ហាញសមត្ថភាពល្អនេះហើយ ទើបពេលនេះលោក Lionel Scaloni គ្រូបង្វឹកអាហ្សង់ទីន កោះហៅចូលជម្រើសជាតិតែម្ដង។
Garnacho ត្រូវបានអាហ្សង់ទីនកោះហៅចូលជម្រើសជាតិម្ដងមកហើយកាលពីត្រៀមលេង World Cup 2022 កន្លងទៅ ប៉ុន្តែមិនបានជាប់ទៅលេងនៅ World Cup ចុងក្រោយនោះទេ។ នេះជាលើកទី២ហើយ ដែលរូបគេទទួលបានការកោះហៅចូលជម្រើសជាតិ ហើយក៏សង្ឃឹមថានឹងទទួលបានឱកាសបង្ហាញខ្លួនលើទីលានផងដែរ៕
