FIFA សម្រេចប្ដូររូបមន្ដមកចាស់វិញ ក្នុងមួយពូល មាន៤ក្រុមដដែល
សហព័ន្ធបាល់ទាត់អន្ដរជាតិ FIFA បានសម្រេចចិត្ដប្ដូររូបមន្ដមកប្រើ Format ចាស់វិញ ដោយក្នុងមួយពូល មានក្រុម៤ដដែលសម្រាប់ការប្រកួត FIFA World Cup 2026។
ដំបូងឡើយ FIFA បានប្រកាសថាការប្រកួត FIFA World Cup 2026 ដែលធ្វើឡើងនៅ៣ប្រទេសរួមគ្នា សហរដ្ឋអាមេរិកមិចសិកូ និងកាណាដា នោះនឹងមានក្រុមចូលរួម៤៨ក្រុម ប្រើរូមបន្ដថ្មី ចែកជា១៦ពូល ក្នុងមួយពូល មាន៣ក្រុម។ តែក្រោយពីមានការវែកញែកច្រើនមក ទើបពេលនេះ FIFA សម្រេចចិត្តត្រលប់ទៅប្រើរូបមន្ដចាស់ មួយពូល មាន៤ក្រុមវិញហើយ ប៉ុន្តែផ្លាស់ប្ដូរក្បួនលេងបន្ដិចបន្ដួច។
ដោយក្រុមចូលរួមនៅ FIFA World Cup 2026 នឹងរក្សា៤៨ក្រុមដដែល បែងចែកជា១២ពូល ក្នុងមួយពូល មាន៤ក្រុម។ ដោយការប្រកួតជម្រុះនេះដែរ ក្រុមលេខ១និងលេខ២ ឡើងទៅវគ្គបន្ដស្វ័យប្រវត្តិ អមជាមួយក្រុម៨ទៀតដែលស្ថិតនៅចំណាត់ថ្នាក់លេខ៣តាមពូលល្អបំផុត។ សរុបទៅនៅសល់៣២ក្រុមដដែល ឆ្លងកាត់ការប្រកួតវិលជុំតាមពូលលើកទី១។ ដោយវគ្គ៣២ក្រុមនឹងត្រូវចាប់ឆ្នោតប៉ះគ្នាបន្ដទៀត។ រូបមន្ដថ្មីនេះ នឹងធ្វើឱ្យការប្រកួត World Cup 2026 ឡើងដល់១០៤ប្រកួតនិងមានប្រទេសចូលរួមបានកាន់តែច្រើន៕
