ខ្សែប្រយុទ្ធ Earling Haaland បានបោះសម្ដីថាក្លឹប Manchester City ទិញគេមកនារដូវកាលនេះ គឺដើម្បីសម្រេចគោលបំណងឈ្នះពានរង្វាន់ UEFA Champions League ឱ្យបាន។
Haaland រកបាន៥គ្រាប់កាលពីប្រកួតទល់ក្រុម Leipzig កន្លងទៅ និងជួយក្លឹប Man City ឡើងវគ្គ៨ក្រុមពានរង្វាន់ UEFA Champions League ផងដែរ។ កីឡាករន័រវែសរូបនេះ រកបានដល់ទៅ៣៨គ្រាប់ទៅហើយនាពេលបច្ចុប្បន្នក្នុងរដូវកាលដំបូងរបស់ខ្លួននៅ Man City ហើយក៏រំពឹងថានឹងបន្ដបង្កើតកំណត់ត្រាបន្ថែមទៀត ព្រោះការប្រកួតនៅសល់ច្រើន។
សម្រាប់ Haaland វ័យ២២ឆ្នាំបានបង្ហាញចំណាប់អារម្មណ៍បែបនេះថា៖ “ជារឿងពិត ក្លឹបទិញខ្ញុំមកដើម្បីឈ្នះពានរង្វាន់ UEFA Champions League។ ពួកគេបានឈ្នះពាន Premier League ៤ដងក្នុង៥ឆ្នាំចុងក្រោយនេះ។ ពួកគេមិនបានទិញខ្ញុំមកឈ្នះពាននេះទេ ព្រោះពួកគេឈ្នះវាបានច្រើនទៅហើយ។ ដូច្នេះដូចដែលគ្រប់គ្នាបានឃើញ ខ្ញុំមកដើម្បីជួយក្លឹបឱ្យកាន់តែខ្លាំង និងឈ្នះ Champions League ជាលើកដំបូងឱ្យបាន”៕
