ខ្សែប្រយុទ្ធ Erling Haaland បានឡើងតម្លៃខ្លួនប្រមាណ ២០លានអ៊ឺរ៉ូ ក្រោយផ្លាស់មកលេងឲ្យក្លឹប Manchester City បាន៤ខែ។ នេះបើយោងតាមការចុះផ្សាយរបស់ Transfermakrt ក្នុងថ្ងៃនេះ។
កាលពីចុងរដូវកាលឆ្នាំ២០២១/២២កន្លងទៅនេះ ក្នុងកំឡុងពេលលេងឲ្យក្លឹប Borussia Dortmund កីឡាករ Haaland មានតម្លៃ១៥០លានអ៊ឺរ៉ូ ប៉ុន្តែនៅពេលនេះ គេបានឡើងតម្លៃខ្លួនរហូតទៅដល់ ១៧០លានអ៊ឺរ៉ូ។
បើតាម Daily Mail ខ្សែប្រយុទ្ធ Haaland ត្រូវបាន Man City ទិញពី Dortmund ក្នុងតម្លៃផ្ដាច់កុងត្រាប្រមាណ៦០លានអ៊ឺរ៉ូប៉ុណ្ណោះ ប៉ុន្តែជាមួយនឹងប្រាក់ពលកម្មជាង ១លានអ៊ឺរ៉ូក្នុង១សប្ដាហ៍ ដោយមានកុងត្រារហូតដល់ថ្ងៃទី៣០ ខែមិថុនា ឆ្នាំ២០២៧។
ក្រោយផ្លាស់មក Man City កីឡាករដើមកំណើតន័រវេសរូបនេះកាន់តែមានភាពជោគជ័យខ្លាំងលើអាជីពរបស់ខ្លួន ដោយមកទល់នឹងនេះគឺចូលលេងឲ្យក្លឹបបាន១៦ប្រកួត និងស៊ុតចូលរហូតទៅដល់ ២២គ្រាប់៕
