លោក Luis Enrique ថានឹងមានបញ្ហាជាមួយកូនស្រីខ្លួនមិនខាន ប្រសិនបើមិនព្រមដាក់កីឡាករ Ferran Torres ឱ្យចូលលេងនៅព្រឹត្តិការណ៍ FIFA World Cup 2022 នេះ។
Torres ខ្សែប្រយុទ្ធក្នុងក្រុមជម្រើសជាតិអេស្ប៉ាញ កំពុងមានទំនាក់ទំនងស្នេហាជាមួយកូនស្រីរបស់គ្រូបង្វឹកLuis Enrique តាំងពីដើមឆ្នាំ២០២២នេះម្ល៉េះ ដោយពួកគេទាំងពីរបានបើកបង្ហាញតែម្ដង។ ដូច្នេះមានន័យថានៅ World Cup 2022 នេះ លោក Enrique នឹងត្រូវដឹកនាំក្រុមអេស្ប៉ាញដែលមានកូនប្រសារស្ថិតក្នុងនោះដែរហើយ។ មួយវិញទៀត លោកបាននិយាយបែបលេងសើចទៀតថា ប្រសិនបើមិនបានដាក់ Torres លេងទេ នោះលោកនឹងមានរឿងជាមួយកូនស្រីខ្លួនមិនខាន។
អតីតគ្រូបង្វឹករបស់ក្រុម Barcelona បានអះអាងថា៖ “ប្រសិនបើខ្ញុំមិនបានដាក់ Torres ឱ្យលេងទេ នោះច្បាស់ណាស់កូនស្រីរបស់ខ្ញុំនឹងមករករឿងខ្ញុំជាក់ជាមិនខាន។ ខ្ញុំជាគ្រូបង្វឹក ខ្ញុំដឹងថាត្រូវរៀបចំយ៉ាងណាហើយសម្រាប់ក្រុមអេស្ប៉ាញ និងជម្រើសដ៏ល្អបំផុតដើម្បីស្វែងរកជ័យជម្នះ”។ រំលឹកថាអេស្ប៉ាញនៅ World Cup 2022 នេះស្ថិតនៅពូលជាមួយក្រុម អាល្លឺម៉ង់ ជប៉ុន និង កូស្ដារីកា៕
