Pep ថា Chelsea គួរឱ្យពេលលោក Potter បន្ដិចទៀត ដើម្បីស្ដារក្រុមឡើងវិញ
លោក Pep Guardiola បានអះអាងថាក្រុម Chelsea គួរតែផ្ដល់ពេលច្រើនឱ្យទៅលោក Graham Potter អ្នកចាត់ការក្រុម ប្រសិនបើចង់ឃើញលទ្ធផលល្អប្រសើរឡើងវិញ។
ក្រោយពីបរាជ័យផ្ទួនៗគ្នាទាំងនៅលីគកំពូលអង់គ្លេសនិង FA Cup កន្លងមកនេះ បានធ្វើឱ្យអ្នកគាំទ្រក្រុមតោខៀវមិនសប្បាយចិត្តនោះទេ។ ពួកគេបានបង្ហាញឱ្យឃើញពីចេតនាចង់បណ្ដេញអ្នកចាត់ការក្រុមចោលទៅហើយ ក្រោយពីលេងមិនល្អសោះ និងបច្ចុប្បន្ន Chelsea នៅលេខរៀងទី១០ឯណោះក្នុងតារាង Premier League ហើយក៏ធ្លាក់ចេញពី FA Cup ដោយចាញ់ Man City យ៉ាងអាម៉ាស់។
តែបើតាមសម្ដីរបស់លោក Pep វិញ មើលឃើញផ្សេងពីអ្នកគាំទ្រ។ លោកបាននិយាយថា៖ “ខ្ញុំចង់និយាយទៅកាន់ប្រធានក្លឹប Todd Boehly ថាគួរតែផ្ដល់ពេលវេលាបន្ថែមទៀតដល់គាត់។ ខ្ញុំដឹងនៅក្លឹបធំ លទ្ធផល គឺសំខាន់ណាស់ ប៉ុន្តែខ្ញុំចង់ឃើញពួកគេផ្ដល់ពេលវេលាបន្ថែមដល់ Potter ។ យើងត្រូវការពេលនៅរដូវកាលដំបូង។ ខ្ញុំ មាន Messi នៅ Barcelona នៅរដូវកាលដំបូងរបស់ខ្ញុំ ដូច្នេះខ្ញុំមិនចាំបាច់ត្រូវការពេល២រដូវកាលទៀតនោះទេ ព្រោះខ្ញុំមាន Messi នៅទីនោះ”៕
