Real Madrid កំពុងផ្ដោតអារម្មណ៍លើ Son របស់ក្រុម Spurs ។
ក្រុមអធិរាជស Real Madrid កំពុងចាប់អារម្មណ៍ទៅលើខ្សែប្រយុទ្ធ Son Heung-min ដែលបច្ចុប្បន្នកំពុងលេងឱ្យក្រុម Spurs នៅលីគកំពូលអង់គ្លេស។
កីឡាករកូរ៉េខាងត្បូងរូបនេះទទួលបានចំណាត់ថ្នាក់លេខ១១ក្នុងតារាង Ballon dÓr កាលពីពេលថ្មីៗនេះ បន្ទាប់ពីរដូវកាលមុនគេរកបាន២៣គ្រាប់ ក្លាយ
ជា Top Scorer នៅលីគកំពូលអង់គ្លេស។ តែរដូវកាលនេះ បន្ទាប់ពីលោក Antonio Conte នាំយកខ្សែប្រយុទ្ធថ្មីៗមករួមក្រុមទៀត ធ្វើឱ្យ Son ហាក់មិនសប្បាយចិត្តនោះទេ ហើយទម្រង់លេងនារដូវកាលនេះក៏មិនបានល្អដូចរដូវកាលមុនផងដែរ។ កត្ដានេះហើយ ទើបលោក Carlo Ancelotti ចាប់អារម្មណ៍នាំយករូបគេទៅលេងនៅអេស្ប៉ាញវិញ។
ខ្សែប្រយុទ្ធវ័យ៣០ឆ្នាំខាងលើមានកុងត្រារហូតដល់ឆ្នាំ២០២៥ឯណោះ។ ខណៈដែលរូបគេចូលរួមជាមួយក្រុម Spurs នៅឆ្នាំ២០១៥ ជាមួយតម្លៃផ្ទេរពីក្រុម Bayer Leverkusen មក ២៧លានផោន។ ក្នុងនាមជាខ្សែប្រយុទ្ធឆ្នើមនៅអាស៊ី Son រកគ្រាប់បាល់សរុបឱ្យក្រុម Spurs បាន១៣៦គ្រាប់មកហើយ និងបញ្ជូនបាល់ឱ្យមិត្តរួមក្រុមបាន៧៦គ្រាប់។ គេជាដៃគូយល់ចិត្តគ្នាណាស់ជាមួយខ្សែប្រយុទ្ធ Harry Kane ៕
