វាជាផែនការណ៍ខ្នាតយក្ស រៀបចំឡើងដោយក្លឹបអធិរាជស Real Madrid ក្នុងការចង់ថ្ពក់យកមនុស្សយន្ត Erling Haaland ដោយមិនចាំបាច់ឆ្លងកាត់ ការយល់ព្រមពីសំណាក់ក្លឹបអាណាព្យាបាល។ នោះគឺមានន័យថា ឲ្យតែកិច្ចព្រមព្រៀងតម្លៃផ្តាច់កុងត្រាចូលមកដល់ គឺភាគីក្លឹបចង់បាន នឹងបញ្ចេញកញ្ចប់ថវិកាទៅភ្លែត។
ជាការពិតសំពៅមាស Man City បានថ្ពក់យកយុវជនន័រវេស ចេញពី Dortmund កាលរដូវក្តៅ នៅតម្លៃល្បាក់ជាង ៥០ លានផោនប៉ុណ្ណោះ ដល់តែកិច្ចព្រមព្រៀងតម្លៃផ្តាច់កុងត្រា ត្រូវដំណើរការនាឆ្នាំក្រោយ ២០២៤ គឺឡើងដល់ ១៩០ ទៅជាង ២១០ លានផោន។នេះមានន័យថា បើទោះបី Haaland ជាប់កុងត្រាជាមួយក្លឹបម្ចាស់ដី Etihad ដល់ចុងខែមិថុនា ឆ្នាំ ២០២៧ ក៏គេនៅតែមានសិទ្ធអាចដើរចេញ ទៅចុះចូលនៅក្លឹបដទៃ ប្រសិនភាគីក្លឹបចង់បាន ហ៊ានទូទាត់លើប្រាក់ផ្តាច់កុងត្រាក្នុងទំហំដ៏ច្រើនមហាសាលខាងលើ។
តាមសារព័ត៌មាន AS បានចុះផ្សាយ ក្លឹបក្រោមការដឹកនាំដោយប្រធានលោក Florentino Perez បានដាក់ឈ្មោះ Haaland ជាគោលដៅអាទិភាព ហើយក៏នឹងមិនញញើតក្នុងការចាយវាយប្រាក់ជាង ២០០ លានផោននោះដែរ។ វាគឺជាយុទ្ធវិធីរៀបឈុតប្រយុទ្ធរជ្ជកាលថ្មី ដោយក្លឹបម្ចាស់ដី Bernabeu ចង់បូកបញ្ចូលគ្នា រវាង Haaland, Kylian Mbappe និង Vinicius Jr នាថ្ងៃអនាគត។
