Ronaldo នឹងស្នាក់នៅសណ្ឋាគារបណ្ដោះអាសន្ន មុនរកផ្ទះបាននៅ Riyadh
ដោយសារតែមិនទាន់រកផ្ទះបាន ខ្សែប្រយុទ្ធ Cristiano Ronaldo នឹងស្នាក់នៅសណ្ឋាគារ Four Seasons សិន ដោយនេះជាកន្លែងលំដាប់អភិជនស្នាក់នៅហើយ។
Ronaldo ទើបសម្រេចការផ្ទេរទៅលេងនៅ Al Nassr កាលពីសប្ដាហ៍មុន ជាមួយតម្លៃពលកម្មទទួលបាន១៧៥លានផោនក្នុង១ឆ្នាំ។ ការទៅលេងនៅលីគកំពូលរបស់អារ៉ាប់ប៊ីសាអូឌីតនេះ បានធ្វើឱ្យ Ronaldo ក្លាយជាកីឡាកររកចំណូលបានខ្ពស់បំផុតក្នុងប្រវត្តិសាស្ត្របាល់ទាត់ហើយ។ ដោយសូម្បី Kylian Mbappe និង Lionel Messi ក៏ទទួលបានប្រាក់ចំណូលទាបជាងនេះដែរនៅក្លឹប PSG ។
យ៉ាងណាមិញ ដោយសារតែការផ្លាស់ទៅភ្លាមៗពេក ពេលនេះ Ronaldo មិនទាន់រកបានផ្ទះនៅឡើយទេ។ កីឡាករវ័យ៣៧ឆ្នាំនឹងស្នាក់នៅសណ្ឋាគារ Four Seasons មួយរយៈសិន។ ដោយតាមដំណឹងមក សណ្ឋាគារនេះនឹងរៀបចំបន្ទប់ពិសេសឱ្យគ្រួសាររបស់ Ronaldo តែម្ដង។ ងាកទៅតម្លៃវិញ មានប្រភពអះអាងថា ១ខែនឹងត្រូវចំណាយអស់ប្រមាណជាជាង៣០ម៉ឺនដុល្លារឯណោះ។ ដោយនេះជាការរស់នៅបែបឯកជនបំផុតសម្រាប់គ្រួសារកំពូលកីឡាករល្បីឈ្មោះលើលោកនេះហើយ៕
