លោក Gareth Southgate និយាយថាក្រុមអង់គ្លេសបច្ចុប្បន្នកំពុងបង្ហាញទម្រង់លេងកម្រិតកំពូលមួយ ដែលអាចនិយាយបានថាជាក្រុមល្អបំផុតមួយនៅអឺរ៉ុបទៅហើយ។
នៅក្នុងការប្រកួតជម្រុះ Euro 2024 កន្លងទៅនេះ ក្រុមអង់គ្លេសធ្វើបានល្អ ២ប្រកួតឈ្នះទាំងពីរប្រកួតតែម្ដង ហើយសុទ្ធតែជាការប្រកួតទល់ក្រុមខ្លាំងថែមទៀត។ ជាក់ស្ដែងប្រកួតដំបូង ពួកគេឈ្នះអ៊ីតាលី នៅទឹកដីអ៊ីតាលីដែលជាការបំបែកកំណត់ត្រា៦២ឆ្នាំរបស់ពួកគេដែលអាចទទួលបានជ័យជម្នះនៅទឹកដីអ៊ីតាលីបាន។ ខណៈដែលប្រកួតទី២នៅយប់មិញនេះ យកឈ្នះលើក្រុមអ៊ុយក្រែនបានទៀត។
ជាមួយទម្រង់លេងយ៉ាងល្អនេះហើយ ទើបបានជាលោក Southgate មានទំនុកចិត្តថាក្រុមអង់គ្លេសរបស់លោកកំពុងឈានទៅរកទម្រង់លេងមួយដែលឋិតថេរ និងអាចនិយាយបានថាក្លាយជាក្រុមល្អបំផុតមួយនៅអឺរ៉ុបទៅហើយ។ ការត្រៀមខ្លួនបានល្អ និងកីឡាករពោរពេញទៅដោយសមត្ថភាព បទពិសោធបែបនេះនឹងជួយអង់គ្លេសបានច្រើនក្នុងការប្រកួត Euro 2024 ជាក់ជាមិនខាន៕
