លោក Erik ten Hag ចង់ឃើញអ្នកគាំទ្រផ្ដល់កម្លាំងចិត្តឱ្យខ្លាំងថែមទៀត ក្នុងការប្រកួតទល់ក្រុម FC Barcelona នៅពាក់កណ្ដាលសប្ដាហ៍នេះ ពានរង្វាន់ Europa League ជើងទី២។
ក្រុមបិសាចក្រហម មានការប្រកួតញឹកមែនទែន។ ពួកគេនឹងបន្ដទៅប៉ះក្រុម Barcelona នៅជើងទី២នៃពានរង្វាន់ Europa League ទៀតនៅថ្ងៃព្រហស្បតិ៍សប្ដាហ៍នេះ។ ជំនួបនេះដែរ នឹងត្រូវកាត់សេចក្ដីថាក្រុមណាឡើងទៅវគ្គបន្ដហើយ ព្រោះកាលពិជើងទី១កន្លងទៅនៅទឹកដីអេស្ប៉ាញ ពួកគេលេងស្មើគ្នាក្នុងលទ្ធផល ២-២។
លោក Ten Hag បាននិយាយថា៖ “យើងគិតពីមួយប្រកួតទៅមួយប្រកួត។ ថ្ងៃព្រហស្បតិ៍នេះ ជាការប្រកួតធំសម្រាប់ពួកយើង។ យើងត្រូវតែប្រយុទ្ធ អ្នកគាំទ្ររបស់យើងត្រូវតែធ្វើឱ្យកីឡដ្ឋាន Old Trafford ពោរពេញដោយការលើកទឹកចិត្ត ហើយយើងក៏ត្រូវរៀបចំគម្រោងនៃការប្រកួតឱ្យបានត្រឹមត្រូវផងដែរ”។ ក្រុម Man Utd នៅសល់ការប្រកួតច្រើនណាស់ ពោលគឺចប់ការប្រកួតជាមួយ Barcelona នេះទៅ ពួកគេនឹងបន្ដទៅលេង Carabao Cup ផ្ដាច់ព្រ័ត្រ ទល់ Newcastle United និងពាន FA Cup ជុំទី៥ ទល់ West Ham នៅត្រឹមខែនេះ៕
