នេះគឺជាការប្រកួត FIFA World Cup លើកទី ២២ កំពុងតែដំណើរការយ៉ាងសកម្ម យើងយើងក៏បានរកឃើញក្រុមដែលត្រូវហាលអាវជាបណ្តើរៗហើយ ជាក់ស្តែងគឺក្រុមមកពីអាស៊ី កាតារជាម្ចាស់ផ្ទះនោះឯង។
យ៉ាងណាយើងចាប់អារម្មណ៍ ៣ ក្រុមមកពីអាស៊ី ដែលបង្កើតលទ្ធផលដ៏ភ្ញាក់ផ្អើលនៅព្រឹត្តិការណ៍សារនេះ ដូចអារ៉ាប៊ីសាអ៊ូឌីតយកឈ្នះ ២-១ អាហ្សង់ទីន, ជប៉ុនបំបាក់អាល្លឺម៉ង់ ២-១ និងកន្លងទៅថ្មីថ្មោងអ៊ីរ៉ង់យកឈ្នះក្រុមមកពីអឺរ៉ុបជាលើកដំបូងនៅ World Cup គឺហូបវែល ២-០។ ប៉ុន្តែបើនិយាយជារួម ចាប់តាំងការបង្កើត World Cup នាឆ្នាំ ១៩៣០ តើអ្នកដឹងទេថា ប្រវត្តិសាស្ត្រក្រុមមកពីអាស៊ីធ្លាប់ធ្វើបានល្អបែបណាខ្លះ ហើយឡើងខ្ពស់បង្អស់ត្រឹមវគ្គណា?
ក្រុមមកពីអាស៊ី បានឡើងមកលេង World Cup ជាលើកដំបូង នៅឆ្នាំ ១៩៣៨ គឺហូឡង់បូព៌ា ឬសព្វថ្ងៃត្រូវបានគេស្គាល់ជាប្រទេសឥណ្ឌូណេស៊ី។ សរុបនៅការប្រកួតផ្លូវការ មាន ៤៣ លើក ដែលប្រទេសនៅអាស៊ីបានមកចូលរួម ហើយ World Cup 2022 ជាលើកដំបូងមានជម្រើសជាតិចេញពីទ្វីបខាងលើ ដល់ទៅ ៦។
បន្តទៅវគ្គ ១៦ ក្រុម ជម្រើសជាតិមកពីអាស៊ីឡើងបាន ៦ លើក លុះដល់វគ្គ ៨ ក្រុមចូលបាន ២ លើក ហើយវគ្គ ៤ ក្រុមចុងក្រោយបាន ១ លើក ក៏ជាប់ចំណាត់ថ្នាក់ទី ៤ នោះហើយជាលទ្ធផលល្អបំផុតរបស់ក្រុមមកពីអាស៊ីនៅ World Cup។
សង្ខេបត្រួសៗនៅសម័យកាលឆ្នាំ ១៩៦៦ សារនោះ World Cup លេងតែ ១៦ ប្រទេសប៉ុណ្ណោះ ហើយកូរ៉េខាងជើង ស្ថិតក្នុង Group 4 បានឈរចំណាត់ថ្នាក់ទីពីរ ក្រោមសហភាពសូវៀត តែយកឈ្នះទៅលើអ៊ីតាលី និងឈីលី។ ជាហេតុនាំឲ្យកូរ៉េខាងជើងបានឡើងទៅវគ្គ ៨ ក្រុម តែបរាជ័យក្រោមថ្វីជើងព័រទុយហ្គាល់ ៥-៣។
ចូលទៅសម័យកាលឆ្នាំ ១៩៩៤ អារ៉ាប៊ីសាអ៊ូឌីតជាអ្នកសាងមុខមាត់តំណាងឲ្យតំបន់អាស៊ី ឡើងបានដល់វគ្គ ១៦ ក្រុម តែស្តាយចាញ់ស៊ុយអែត ៣-១។ ចូលដល់សម័យកាលមាសរបស់ក្រុមអាស៊ី នៅ World Cup ក៏ជាសម័យកាលគួរឲ្យចងចាំបំផុត គឺពេលកូរ៉េខាងត្បូង/ជប៉ុនចាប់ដៃគ្នាធ្វើជាម្ចាស់ផ្ទះ ហើយពួកគេបានឡើងទៅវគ្គ ១៦ ក្រុមដូចគ្នា តែជប៉ុនបានធ្លាក់ត្រឹមវគ្គនេះ ក្រោយចាញ់អ៊ីតាលី ស្របពេលកូរ៉េខាងត្បូងយកឈ្នះអ៊ីតាលី យកឈ្នះអេស្ប៉ាញ ហើយបន្តមកដល់វគ្គ ៤ ក្រុមចុងក្រោយ បែរចាញ់អាល្លឺម៉ង់ ១-០។ នៅការប្រកួតដណ្តើមយកលេខ ៣ ពួកគេត្រូវប៉ះទួរគី តែមិនអាចយកជ័យជម្នះបាន ម្ល៉េះត្រឹមឈរចំណាត់ថ្នាក់ទី ៤ ប៉ុណ្ណោះ។
រង់ចាំដល់ ៨ ឆ្នាំបន្ទាប់ គឺសម័យកាល ២០១០ ទើបក្រុមមកពីតំបន់អាស៊ី បានឡើងទៅវគ្គ ១៦ ក្រុមជាថ្មី សារនេះគឺកូរ៉េខាងត្បូងនិងជប៉ុនដដែល តែបរាជ័យដូចគ្នា ក្រោមថ្វីជើងអ៊ុយរុយហ្គាយ និងប៉ារ៉ាហ្គាយ។ ដល់សម័យកាល ២០១៨ អាស៊ីប្រើសមត្ថភាពសុទ្ធសាធឈោងបាន ៥ កៅអីជាលើកដំបូងនៅ World Cup តែឡើងដល់វគ្គ ១៦ ក្រុមបានតែមួយប៉ុណ្ណោះ គឺ ជប៉ុន ចាញ់បែលហ្សិក ២-៣។
ឥឡូវយើងចាំមើលព្រឹត្តិការណ៍សារនេះ ដ្បិតអី ៦ ប្រទេស មាន ១ ធ្លាក់បាត់ទៅហើយ នៅឡើយ ៥ ទៀតចាំអ៊ុតមើល ហើយរាត្រីនេះលើទំព័រ CTS Sports ក៏នឹងមានផ្សាយផ្ទាល់ប្រកួតក្រុមមកពីអាស៊ីផងដែរ គឺទុយណេស៊ី ប៉ះអូស្រា្តលី វេលាម៉ោង ០៥ ល្ងាច និងប៉ូឡូញ ប៉ះអារ៉ាប៊ីសាអូឌីត វេលាម៉ោង ០៨ ល្ងាច៕
